नैना क्षेत्रातील विकासकामांचा मुख्यमंत्री देवेंद्र फडणवीस यांच्या हस्ते शुभारंभ; कनेक्टिव्हिटी प्रकल्पांचे लोकार्पण

नवी मुंबई : मुख्यमंत्री देवेंद्र फडणवीस यांच्या हस्ते नवी मुंबई विमानतळ प्रभाव अधिसूचित क्षेत्र (नैना) परिसरातील विविध विकासकामांचा शुभारंभ करण्यात आला. यावेळी जमीनधारकांना मालमत्ता पत्रकांचे वितरण करण्यात आले. तसेच नवी मुंबई आंतरराष्ट्रीय विमानतळ परिसरातील कनेक्टिव्हिटी अधिक सुलभ करण्याच्या दृष्टीने महत्त्वपूर्ण पुलांचे आणि उरण बाह्य वळण पुलाचे लोकार्पण करण्यात आले.
नैना टाउन प्लॅनिंग स्कीम (टीपीएस) अंतर्गत विविध पायाभूत सुविधा प्रकल्पांचे भूमिपूजन या कार्यक्रमात करण्यात आले. या प्रकल्पांमुळे संबंधित परिसरातील नियोजनबद्ध विकासाला चालना मिळण्याची अपेक्षा आहे. जमीनधारकांना मालमत्ता पत्रके वितरित केल्यामुळे त्यांच्या मालमत्तेसंबंधी अभिलेख उपलब्ध होण्यास मदत होणार आहे.
नवी मुंबई आंतरराष्ट्रीय विमानतळ परिसरातील वाहतूक व्यवस्था अधिक सुलभ करण्यासाठी एसबीआर-९ (स्टिल्ट ब्रिज), बीआर-४ आणि बीआर-५ या पुलांचे लोकार्पण करण्यात आले. याशिवाय उरण बाह्य वळण पुलाचेही लोकार्पण करण्यात आले. या कनेक्टिव्हिटी प्रकल्पांमुळे विमानतळ परिसरासह उरण भागातील दळणवळण अधिक सुलभ होण्यास मदत अपेक्षित आहे.
या कार्यक्रमाला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, मंत्री भरत गोगावले, खासदार सुनील तटकरे, खासदार श्रीरंग आप्पा बारणे यांच्यासह विविध आमदार आणि मान्यवर उपस्थित होते.
नैना क्षेत्रातील पायाभूत सुविधांचा विकास, जमीनधारकांना मालमत्ता पत्रकांचे वितरण आणि महत्त्वपूर्ण कनेक्टिव्हिटी प्रकल्पांचे लोकार्पण या माध्यमातून नवी मुंबई व परिसराच्या विकासाला चालना देण्याच्या दृष्टीने या कार्यक्रमाला महत्त्व प्राप्त झाले आहे.